John 11

Lasalase kaanebuo weng otabe.

1Betani bib sak make, niniino Lasalase, gembisebe. Betani bibo Malia osa eka o eno Mata osa i dab i bibobe. 2Malia olo wel aaye tang kunin ayame obonoa Yesuse skilono ibabanoa olo gabamano olonoa wel gamo glitubanamabo unang otabe. O heke Lasalase gembe 3kesoa e nengwali Yesuse weng omfubaniba baabaniba Sum kobo keb neke kla goba biebe gembebo ge baabasiba 4Yesuse weng olo wentenea baanea Ginin olo e mo kaanemebabe. Ginin olo tam tlubanobuo inaminobe. Gode funanea Nakaia unangai ne niniino nemtouleb nine genetabe. Gode miin ne naka ele daabaia nakaia unangai natemaibo ne niniin osa nemtouleb nomabiobo ge baasebe. 5Yesuse Mata osa eka o nengo Malia osa eka Lasalas esa i kla gobe binabe 6otane i baaniba Lasalase gembebo geibo e mo unim blimobe. E debianea imin amo asu kenea 7e okok aleyemin naka ni baabenea Nibo imin Yudia betan unomo gesea 8ni baabanoba Aleyemin naka kobo Yudai komokwali memale tomo olo binaniba kananom genamsiba deibe tebieb yole fatnanebta imin unang genebte? gesoba 9Yesuse baabenea Nakai bomanobua afokalo haabiaibo i mo dlo blela yenanomobabe. Niminbabe, bomanobio kesoa i teme bianiba misiam temo deiboniba ayam ota haanomabiobe. Otane mililanobio temo haanimib ile ayal blim kesoa dlo blela yenanamabobe. Nakai tab okok kemibi klayam okok kemomabiobe. Nesa inania memalo ne okok am kesoa okok kebi olo makob nakai tab dim haablib inaminobe. I ne nenaiba kaanamabi amo mo tlim blim biobo ge baabenea 11eka weng mak osa baabenea Nib neke Lasalase aambio, ne monia dofanamabibo ge baabeseo o mitmakamo inaminobe. Lasalase kaanebo gene otane e okok aleyemin naka ni funanoba E besa aambieta obebo ge funaob kesoa ni baabanoba Sum kobo e aalameo e ginino blimubanoa ayam anamabebo gesoba 14Yesuse keim baabenea Lasalase kaanebiobo, 15ne esuo mo nim blim kesoa ne Klayamobo gabibe. Ne ibo daabeia natemniba bainobo getnenomabiobo, ibo tliba esu unomo ge baabesea 16Tomase, e niniin afeto Didimase, Yesuse okok aleyemin naka mak ni baabenea Nibo motemoba nibtem etemna yenaiba kaanomo ge baabenea onsobobe.

Yesuse baanea Neta nakaia unangai kulilabibi dohaania afen smike amit nine dobyenanamabibo genebiobe.

17Yesuse tenea Betani bib asak ye tetemea i baabaniba Lasalase kaanea debeb moniba tom temo dofaibbuo amo asuke asuke nao blimanobo ge baabaiba wentensebe. 18Betani bibo Yelusalem bibo o kikib mebobe. Yelusalem bib daneba Betani bib onamino 3 kilomita ese makobe. 19Mata osa Malia osa i Betani bib ye bianiba ili am ye bliba Yuda nakaia unangai homoni i heke Lasalase kaanebuo teniba kima bianiba mebianiba bliba 20naka maki teniba Matao baaboniba Yesuse tebebo gesiba wentenoa Waisa unano genoa onso otane Maliao sma am tam biotabe. 21Matao motemoa Yesuse tebea atemnoa baabanoa Sum kobo ele biebta mole ne aabe mo kaatnebebabe. 22Otane ne tekein kebibe, kobo Gode baabanemebo e keb wengo wentamabebo gesoa 23Yesuse baabonea Ob heke imin hananamabebo gesea 24o baabanoa Ae ne tekein kebibe, mubiang amo bomanoa nakaia unangai kulila binabibi imin hana tlemib dimo esa imin hananamabebo gesoa 25Yesuse baabonea Neta nakaia unangai kulila binabibi dohaaia imin hananomabiobe. Eka neta nakaia unangai afen smike amit nine dobyamabibe. Nakaia unangai ne bainobo getnenimib ile i damo kaanomabib otane i afen smiko mo kaanomobabe. 26I afen bianiba ne bainobo gabianiba amit nomabiobe. Obo weng olo bainobo gabebo? ge baabosea 27o baabanoa Ae Sum kobo ne olo bainobo geiobe. Kobo Gode Kemfakamin Naka eka e miin na kebtabe. Sinanggwano e baanea Sinanomo ne miine dabaia daaknea dabalim daak unamabebo genebio kebtabo ge baabasobe.

Yesuse melasebe.

28Matao inangge baabanoa unoa Yesuse bibo mo unim blim sma bib asak wato Matao motemnoa weng obinib wat bia Matao monoa o nengo Maliao ayok baabonoa Aleyemin nakae baanea Obo tele genebo gesoa Maliao wentenoa hebmamsab daak bib daak blelanoa motemnam unoa 31Yuda nakaia unangai o kima blibi wateniba funaniba O monoa gloutem unanoa memang genotabo geniba kan bebiba 32Maliao monoa Yesuse atemnoa esu ye dlong dlong golbua daak tounoa osak imin baabanoa Sum kobo ele biebta mole ne aabe mo kaatnebebabo gesoa 33Yesuse yatemea osa eka Yuda nakaia unangai o baka tlib isa memsiba e funanea Kaanamin ota nakaia unangai bobol ilumo omkayebobo genea e bobol tem daako Yebbabo ge baanoa bobol ilum omfubasoa 34baabenea Ibo fab dofaibbione? ge baabesea i baabaniba Sum kobo tenebta atemale gesiba 35e meme 36kesoa Yuda nakaia unangai ateniba baaniba Etemine! E naka ele kla bobol wat dofa binabebua kaanebiota mehabebo geib 37otane mak ile obianiba E sino nakae kino tum gebanobuo klaubanea ayam anebu otane e nimin keneta naka ele mo inaneta klaubaim blim deibaneta kaanebiota mehabene? ge omonsiobe.

Yesuse Lasalase dofaanea imin hanasebe.

38Yesuse bobol ilum omfubasoa e monea gloutem onsebe. Tom tem ele i tom kwame beselibe daleb teniba amite dobdou waisaibbiotabe. 39Yesuse baabenea Tome datlaine gesea kaanebio nakae nengo Matao Yesuse baabanoa Sum kobo e kaanea dofanobbuo amo asuke asuke nao blimanobio kesoa nibo inanob mole fetange kunamabebo gesoa 40Yesuse baabonea Ne sino baabkenia Obo ne bainobo getneneb mole Gode titilo wateneba e niniino dobtouleb namabeobo ge baabkeibiobo gesea 41i tome amite datlasiba Yesuse delubmanea abilim ut teme bianea baanea Ay kobo klayam naneba ne wengo wentutnenebobe. 42Ne tekein kebibe, kobo ne wengo amitie wentene binabeb otane ne memalo baania Kobo klayam naneba ne wengo wentutnenebobo gei ole o mitmakamo inaminobe. Nakaia unangai ele blib eli keb titilo wateniba bainobo geniba kebta ne nemaneba tlibiobo geine genita weng olo baabkeiobo ge baabanea 43eka Lasalase nganabanea Lasalaso! Kobo gloutemo deiboneba tam tele gesea 44haam ele e skila kweila kibiao youmo genubaibbuo yeb bakasa tam tenea keim ele tesea Yesuse baabenea Ibo e skila kweila kibiao youmo genubaibbuo tila kenubaine gesea i tila kenubasiobe.

Yudai komokwali baaniba Yesuse ananomo gesiobe.

(Matyu 26:1-5 Mak 14:1-2 Luk 22:1-2)

45Yuda nakaia unangai homoni Maliao bekebo blibi Yesuse kukub olo naneo wateniba e bainobo gebaib 46otane maki moniba Felisiei baabeniba Yesuse inaneta atem tlobobo ge baabesiba 47Gode amo kimanin nakai komokwal isa eka Felisie isa i miniba teka bianiba baaniba Naka ele okok sumo nabe olo nibo mo wataim blim kenomobo e amitie nabea nakaia unangai alukum ateniba e bainobo gebaiba e i komok sum anea Lomo komok sume alango dokone mole Lomo komokwali atliaubenoa i meletani dlaib teniba Gode am sum osa eka nib nakaia unanga isa watwat danomabiobo gesiba 49naka make ye bie, e niniino Kaiafase, bifole ye dime e Gode amo kimanin nakai komok sum am bie kesoa e baabenea Ibo tobtlim biobe. 50Naka elekiem ele ananoba kaanemeo Lom teni Yuda nibo alukumo mo yalaibbabe. E ananoba kaanemeo nibo alukum daabenea Lom teni nibo mo yalomabibba kesoa kukub olo klayamobo ge baabesebe. 51Kaiafase weng olo inangge baabeseo e ele bobol temo mo baabeim blimobe. E bifole ye dime Gode amo kimanin nakai komok sum am bie kesoa Gode e bobol tem funino omalea e weng olo baabenebuo mitmakamo inaminobe. Yesuse kaanamabeo Yuda nakaia unangai daabenea ayam nomabiobe. 52Eka e inanamabeo Yudai ilita mo daabenemebabe. E Yudaba naka afet isa daabenamabebe. E inanea kaanea hananamabe kesoa Gode meletani bib mak bib mak olo blibi alukum makob anomabiobe. 53Kaiafase weng olo baabene kesoa amo yo dim ota Yudai komokwali Yesuse ananamin wengo kiloniba omonsiobe. 54I ananom genamib kesoa Yesuse Yuda nakaia unanga isuo keimo mo haanin blimobe. E monea Eflaim bib ye bianea e okok aleyemin nakai tena binibbiobe. Bib olo ibuantemo kikib ye biotabe.

55Gode singkalin am sumo, niniino Fasobao, Yudai bleto yis blim dowonamin amo dikib tlo kesoa nakaia unangai homoni i bib amo deiboniba dli tete bianiba Yelusalem bibo Gode kin dimo ayam anamin kukubo klanoba Gode kin dimo ayam anobta Fasoba imen ole mit dowonomo geniba klamonsiobe. 56Gode amo kimanin nakai komokwal isa eka Felisie isa i funaniba Nibo Yesuse atemob mole klabuto ge debeb unomo geib kesoa i nakaia unangai baabeniba Ibo Yesuse atemib mole hebmamsab ni baabeine ge baabesiba nakaia unangai i bibo deiboniba teniba Yelusalem bib ye tlaniba Fasoba falo ga dowonomo gabibi Yesuse hembianiba taniba Gode am sumo tem tam miniba i sinwalo obianiba maki baaibo Ibo fumbibo Yesuse tenea Fasoba imeno dowonamabebo ge fumbibo? ge baasese bisiobe.